La cussegliaziun da construcziun sustegna l'autoritad da construcziun da la vischnanca en moda professiunala, sche quella sto giuditgar dumondas da construcziun.
Sco cussegliadras resp. sco cussegliaders da construcziun s'adattan persunas dal sectur da construcziun (architectas, architects, collavuraturas resp. collavuraturs da la tgira da monuments dal chantun Grischun) che n'han naginas incaricas da construcziun en la vischnanca pertutgada.
La cussegliaziun da construcziun garantescha ch'il concept vegnia examinà en moda professiunala ed uschia sco che quai vegn pretendì en la lescha communala da construcziun e ch'ils giavischs da mantegnair e da concepir in project vegnian resguardads.
Pia èn las incumbensas principalas:
1. mantegnair la substanza architectonica da gronda impurtanza istorica
2. mantegnair il maletg dal vitg
3. garantir la qualitad dal concept d'edifizis novs
La cussegliaziun da construcziun vegn ad optimar l'idea dal project en ina discussiun qualifitgada e colleghiala cun la persuna che fa il project.
L'interess privat e l'interess public tar in project da construcziun po esser il medem. Conflicts d'interess datti per gronda part tar dumondas dal mantegniment e da la concepziun, oravant tut però tar dumondas da la moda d'utilisaziun e da l'intensitad d'utilisaziun d'in edifizi u d'ina parcella da construcziun.
I sa tracta da preschentar ils differents puntgs da vista e da tschertgar la soluziun optimala en ina discussiun cun tut las parts ch'èn participadas al project. Las persunas ch'èn responsablas per la construcziun, las persunas che mainan la construcziun, las autoritads da construcziun e las cussegliadras resp. ils cussegliaders da construcziun ston cuntanscher communablamain la finamira d'in bun project.
Repartiziun dal teriitori (cun charta)
zum_SeitenanfangRU [1]
